«Արդեն 3 ամիս է փակված է Լաչինի միջանցքը, արդեն մենք պետք է խոսենք ոչ թե Լաչինի միջանցքի փակման, այլև՝ ԼՂՀ դեմ Ադրբեջանի կողմից իրականացվող ռազմաքաղաքական ագրեսիայի, սադրանքների, դիվերսիաների մասին»,- ԱԺ արտաքին հարաբերությունների մշտական հանձնաժողով նիստում ասաց «Հայաստան» խմբակցության պատգամավոր Անդրանիկ Թևանյանը։
Հանձնաժողովի այսօրվա նիստի օրակարգում ընդդիմադիր «Հայաստան» խմբակցության հեղինակած «Ադրբեջանի կողմից Լաչինի միջանցքը պարբերաբար փակելու կապակցությամբ» ՀՀ ԱԺ հայտարարության քվեարկությունն է։ Հայտարարությունը քննարկվել էր հունվարի 13-ին, քվեարկությունը հետաձգվել էր մինչև երկու ամսով:
Անդրանիկ Թևանյանը տեղեկացրեց, որ խմբակցությունը լրամշակել է հայտարարության տեքստը:
Նա ընդգծեց, որ Ադրբեջանի գործողությունները միտված են հայաթափելու Արցախը և իրականացնելու էթնիկ զտումեր։
«Իրենք չեն էլ թաքցնում, դա տեսել ենք նաև Լեռնային Ղարաբաղի Հանրապետության պաշտոնյաների հետ հանդիպան ընթացքում նրանց արտահայտած դիրքորոշումներում և արդեն արձանագրում ենք, որ Ադրբեջանը փաստացի չի կատարում նաև Հաագայի դատարանի որոշումը, որը շատ վատ և նախադեպ է, և պրակտիկա ինչպես միջազգային հանրության, այնպես էլ մեր համար։
Այս ամենը մենք արձանագրել ենք լրամշակված տարբերակում, լրամշակված տարբերակը նաև վերնագրի փոփոխություն է ենթադրել։
Ինչպես ասացի, մենք գործ ունենք նաև ռազմաքաղաքական ագրեսիայի հետ»,- ասաց ընդդիմադիր պատգամավորը։
Նա նշեց, որ արձանագրել են՝ 2022 թվականի հոկտեմբերի 6-ին Պրահայում տեղի ունեցած Փաշինյան-Ալիև-Մակրոն-Միշել հանդիպումն է նաև հնարավորություն տվել Ալիևին դիմել այնպիսի գործողությունների, ինչպիսին Լաչինի միջանցքի շրջափակումն է, որովհետև Հայաստանի իշխանությունները ճանաչել են Արցախը որպես Ադրբեջանի մաս։ Ըստ նրա, այս հանգամանքը հաշվի առնելով, փաստացի, Ալիևը վերախմբագրել է 2020 թ. նոյեմբերի 9-ի եռակողմ հայտարարությունը, որտեղ Լաչինի միջանցքն առանձին կարգավիճակ ուներ։
«Մենք այստեղ էլ ենք տեսնում խնդիր, որ Ադրբեջանի իշխանությունները հենց այդ գործողություններին դիմել են նաև օգտվելով Հայաստանի իշխանության դիրքորոշումից։
Այս ամեն ինչը հանրագումարելով, նաև արձանագրելով, որ մենք ակնկալիքներ ունենք և պահանջում ենք, որպեսզի ռուս խաղաղապահներն իրենց ֆունկցիան կատարեն, նաև զորակցություն ենք հայտնում խաղաղապահներին, կրկնեմ նաև՝ այս ամեն ինչի հետ կապված իր ուղղակի մեղավորությունն ու պատասխանատվությունն ունի Հայաստանի իշպանությունը, որը Պրահայում թևեր է տվել Ադրբեջանի իշխանություններին»,- ասաց Ա. Թևանյանը։
Նա առաջարկեց քաղաքական մեծամասնությանը, եթե չեն ընդունելու ներկայացված հայտարարությունը, գոնե դեմ չքվեարկեն՝ դրանով իսկ չվնասելով ՀՀ և Արցախի Հանրապետության շահերին։
ԱԺ «Քաղաքացիական պայմանագիր» խմբակցության անդամ Մարիա Կարապետյանը ՔՊ-ականներին կոչ արեց ձեռնպահ քվեարկել Լաչինի միջանցքի փակման վերաբերյալ «Հայաստան» խմբակցության ներկայացրած հայտարարության տեքստին։
Նա նեց, որ նախորդ օրն ԱԺ «Հայաստան» խմբակցության քարտուղար Արծվիկ Մինասյանի հետ տեղի է ունեցել քննարկում՝ կապված հայտարարության որոշ բառերի և ձևակերպումների հետ, սակայն համաձայնություն չեն եկել առանձին բառերի խմբագրումներ անելու հարցում։
«Մեզ համար կարևոր է, որպեսզի հայտարարության տեքստում շեշտվի ԼՂ հայության իրավունքների և անվտանգության ապահովումը, միջազգային մեխանիզմը, փաստահավաք խումբ ուղարելը։ Ձեզ համար սրանք չեն կարևոր, կարևոր են այլ շեշտադրումներ։ Փաստորեն, ընդհանուր տեքստի գալ հնարավոր չէ»,- ասաց նա։
Մ.Կարապետյանի հիմնավորմամբ, ՔՊ-ի համար ընդունելի չէ՝ հարցին աշխարահաքաղաքական երանգ հաղորդելը։
«Ազգային ժողովի հայտարարությունը ոչ զսպելու է Ալիևին, ոչ էլ սադրելու է։ Այն ուղերձ է միջազգային հանրությանը։ Այս հարցում մենք կարող են ջանալ ձեռք բերել աջակիցներ և կարող ենք լինել անընկալելի միջազգային հանրության համար։ Մենք, բնականաբար, ընտրում ենք առաջին ճանապարհը»,-ասաց ՔՊ-ականը։
Քվեարկության արդյունքում նախագիծն անհրաժեշտ թվով կողմ ձայներ չի ստացել: Նախագծին կողմ է քվեարկել 3, ձեռնպահ՝ 5 պատգամավոր:
