Ազգային ժողովում երեկ ճեպազրույցների ժամ էր, որն անցավ «դժբախտ եւ դժգույն» մթնոլորտում։ Նախ՝ 10 րոպե ուշացումով եկավ «Իմ քայլը», որը ներկայացնում էին Բաբկեն Թունյանն ու Համազասպ Դանիելյանը։ Նրանք հենց սկզբից առաջարկեցին հարցեր ուղղել միայն վերջին քառօրյայում քննարկված հարցերի հետ կապված՝ այդպիսով խուսափելով ներքաղաքական ամենաթեժ օրակարգից։ Բայց լրագրողները չգնացին նրանց առաջարկած «օրակարգով» եւ ուղղեցին այն հարցերը, որոնք առավել ակտուալ էին համարում։
Մասնավորապես, մենք հետաքրքրվեցինք՝ ո՞վ է իրենց համար «ժողովուրդը», որ կարող է եւ իրավունք ունի պահանջել Նիկոլ Փաշինյանի հրաժարականը, քանզի իրենց պատգամավորներից ոմանք այս թեմայով տարօրինակ մեկնաբանություններ են տալիս։ Օրինակ՝ երկու կաթողիկոսները, չորս նախագահները, ընդդիմադիր ուժերը, բազմաթիվ հասարակական-քաղաքական գործիչներ ժողովո՞ւրդ են, թե՞ ոչ։ Առաջինը հակիրճ պատասխանեց Բաբկեն Թունյանը․ «Չնայած օրակարգին չէր վերաբերում հարցը, բայց ասեմ, որ ինձ համար իրենք ժողովրդի մի հատվածն են»։
Համազասպ Դանիելյանն էլ ընդգծված դժկամությամբ պատասխանեց հարցին՝ շեշտելով, որ կարելի էր ժամանակն այլ հարցերի վրա ծախսել․ «Ինչ վերաբերում է, թե ով է ժողովուրդը, դրա սահմանումը, ըստ էության, շատ պարզ կարելի է տեսնել Սահմանադրությունում, եւ դրա ձեւավորման երաշխիքն ընտրություններն են։ Ժողովրդի տարբեր մասեր կարող են միաժամանակ տարբեր բաներ պահանջել։ Դա ստուգելու միակ ձեւն ընտրություններն են»։ Հարցրինք՝ ինքը համարո՞ւմ է, որ կա հանրային պահանջ Նիկոլ Փաշինյանի հրաժարականի, քանզի հազարավոր քաղաքացիներ մեկ ամիս շարունակ փողոցում նրա հրաժարականն են պահանջում, եւ, ի վերջո, իրենց համար ի՞նչ արժեք ունի կաթողիկոսների, նախագահների եւ բազմաթիվ մտավորականների պահանջը։
«Ինձ համար արժեքավոր են ՀՀ յուրաքանչյուր քաղաքացու պահանջները, ակնկալիքները, զգացմունքները, որոնք վերաբերում են քաղաքականությանը, հատկապես, եթե խոսում ենք այն քաղաքացիների մասին, որոնք՝ հիմնավոր թե անհիմն, այդ պահանջները ներկայացնում են հենց իրենցով, այլ ոչ թե տարբեր հանգամանքներով դրդված»,- խորիմաստ պատասխան տվեց Համազասպ Դանիելյանը։
Հետո եկավ «Լուսավոր Հայաստան» խմբակցության ղեկավար Էդմոն Մարուքյանը։ Նրան էլ հարցրինք, թե ինչ են անելու, եթե Նիկոլ Փաշինյանը շարունակի մնալ իշխանության ղեկին եւ հրաժարական չտա։ ««Լուսավոր Հայաստանը» պատրաստվում է անել այն, ինչ որ անում է այսօր՝ հնչեցնել շուրջ 80 հազարից ավելի քաղաքացիների ձայնը, ովքեր մեզ ընտրել են։ Դրան գումարած՝ նաեւ հնչեցնել էն քաղաքացիների ձայնը, ովքեր էս տարիների ընթացքում որոշել են, որ աջակցում են մեզ, այսինքն՝ իրականացնել ալտերնատիվ ընդդիմադիր գործունեություն, ցույց տալ այլընտրանք, ցույց տալ հնարավորություններ, որոնք կան, եւ դրանք պետք է օգտագործվեն»,- ասաց Մարուքյանը։ Հարցին՝ տեսականորեն հնարավոր համարո՞ւմ է, որ Նիկոլ Փաշինյանն այսպես կարող է եւս մեկ տարի ձգել ու հրաժարական չտալ, Մարուքյանն ասաց․ «Կանխատեսում անելն անշնորհակալ գործ է, ես տեսնում եմ, որ ամենաուշը 6 ամսից մենք ունենալու ենք արտահերթ ընտրություններ։ Թե ոնց, ով կկազմակերպի, ոնց կլինի․․․ Ես դա եմ տեսնում։ Կարող է սխալվում եմ, կգա հունիս-հուլիս ամիսը, եթե սխալված լինեմ, նորից կքննարկենք, թե ինչու դա տեղի չունեցավ։ Ասում են՝ քաղաքական գործիչներն ինչ-որ բան են կանխատեսում, հետո, եթե դա չի լինում, ասում են՝ ինչո՞ւ դա տեղի չունեցավ»։ Մեր հարցին՝ արտահերթ ընտրություններ՝ Նիկոլ Փաշինյանի՞ վարչապետությամբ, թե՞ առանց նրա, ասաց․ «Թե ով կանի, չգիտեմ, բայց ես կանխատեսում եմ, որ 6 ամիս հետո արտահերթ ընտրություններ կլինեն»։
Հաջորդը ԲՀԿ-ն էր, որը վերջին քառօրյայում չէր մասնակցում կառավարության հետ հարցուպատասխանին։ Իվետա Տոնոյանին ու Արման Աբովյանին հարցրինք՝ ձեր փողոցային պայքարը դեռեւս արդյունք չի տալիս, Փաշինյանը հրաժարական տալու միտք չունի, ի՞նչ եք պատրաստվում անել, եթե այսպես ամիսներով շարունակվի։
«Նախ, շատ վաղ է գնահատականներ տալ՝ արդյոք պայքարն արդյունք տվել է, թե ոչ․ պայքարն ընթացքի մեջ է, եւ ես առավել քան վստահ եմ, որ մենք այս գործում հաջողելու ենք, որովհետեւ Նիկոլ Փաշինյանի հրաժարականը չունի այլընտրանք։ Եվ մենք վերահաստատում ենք, որ այսօր ստեղծված իրավիճակում Նիկոլ Փաշինյանը չի կարող հանդիսանալ Հայաստանի Հանրապետության անվտանգության երաշխավոր։ Պայքարը շարունակվելու է օրենքով թույլատրելի բոլոր հնարավոր եղանակներով, որ, ի վերջո, Նիկոլ Փաշինյանի մոտ հասունանա այն գիտակցությունը, որ նրա հեռացումը չունի այլընտրանք»,- ասաց Իվետա Տոնոյանը։
Այսինքն՝ ապավինելու եք Փաշինյանի բարձր քաղաքացիական գիտակցությա՞նը։ Տոնոյանն ասաց․ «Ոչ, ես վաղուց արդեն կորցրել եմ իմ լավատեսությունը, ես կարծում եմ, որ հանրային ճնշման ներքո Նիկոլ Փաշինյանը եւ նրա ղեկավարած թիմը հեռանալու են։ Այսօր չկա այլ կարեւոր քաղաքական օրակարգ, քան Նիկոլ Փաշինյանի հեռանալը»։
