ԻՄ ՀՐԱԺԱՐԱԿԱՆՆ ԷԻՆ ՊԱՀԱՆՋՈՒՄ ԿԱՐԾԻՔ ԱՐՏԱՀԱՅՏԵԼՈՒ ՀԱՄԱՐ․ ՍՊԻՏԱԿԻ ՔԱՂԱՔԱՊԵՏ

Այսօր մոտ 10 հոգի գնացել են Սպիտակի քաղաքապետարան և պահանջել քաղաքապետ Գագիկ Սահակյանի հրաժարականը։ Դեռ երեկ լուրեր տարածվեցին, որ «Իմ քայլի» պատգամավոր Հայկ Սարգսյանը (Շիշ բռնող) 5000 դրամով ցուցարարներ է հավաքագրում, որպեսզի առավոտյան փակեն Սպիտակի համայնքապետարանի մուտքը՝ թույլ չտալով Փաշինյանի հրաժարականը պահանջած համայնքի ղեկավար Գագիկ Սահակյանին և ավագանու անդամներին մուտք գործել աշխատավայր: Ըստ տարածված տեղեկությունների՝ Փաշինյանի հրահանգով՝ նման ակցիաներ են պլանավորվել նաև վերջինիս հրաժարականը պահանջած մյուս ՏԻՄ-երում: Մեզ հետ զրույցում Սպիտակի քաղաքապետ Գագիկ Սահակյանն ասաց, որ մոտ 10 հոգի են եղել, երբ հրավիրել է հանդիպման, վերջիններս գնացել են, որ 200 հոգով հետ գան, սակայն չեն եկել:

«Այո, նման բան եղել է, կոնկրետ թիվը չեմ կարող ասել, թե քանի հոգի են եղել, բայց մեկ տասնյակի չէր հասնում, որոնցից մի քանիսը համայնքի բնակիչներ չէին։ Եկել, անհասկանալի պահանջ էին դնում, երբ հրավիրեցինք ներս, որ իրենց պահանջն ասեն, իրենք չեկան, ասացին՝ գնանք, 200 հոգով գանք։ Էսօր պետք է գային 200 հոգով։ Ում ինքս անձամբ ճանաչում եմ, համայնքում իրենց անձնական չլուծված խնդիրներն ունեն՝  կապված տարբեր հարցերի հետ, որոնց համայնքը հստակ պատասխանել է օրինականության սահմաններում։ Իհարկե, դիմել են շատ ատյանների, նրանք էլ են մեկնաբանել, որ համայնքը ձեզ հետ ճիշտ է վարվել, չնայած որ իրենց փաստաթղթերում կան բազմաթիվ կեղծիքներ։ Ես արդեն մեր իրավաբանին հանձնարարել եմ, որ այդ կեղծիքներով փաստաթղթերն ուղարկեն իրավապահ մարմիններին` քննության, թե ինչպես են այդ կեղծված փաստաթղթերը հայտնվել իրենց մոտ։ Օրինակ՝ մարդը 2 կամ 3 անգամ բնակարան է ստացել, էլի բնակարան է ուզում և եկել, իմ հրաժարականն է պահանջում՝ չներկայացնելով ոչ մի հիմք հրաժարականի համար»,- պատասխանեց Սահակյանը։

Նրան հարցրինք՝ ինչպե՞ս կարող է մեկնաբանել, որ իր հրաժարականի համար հատուկ մարդիկ են աշխատում, իր դեմ ցույցեր են կազմակերպում:
«Այդ ֆեյքերի հիմար ֆաբրիկան․․․ նույնիսկ ես այդ ֆեյքերի մի որջ էլ եմ բացահայտել, դրա մասին հետո կբարձրաձայնեմ։ Այդ ֆեյքերին լարում են, այսօր նաև մամուլից տեղեկացա, որ շշի հետ կապված ինչ-որ մեկը կա, շշի մեջ ջուր լցնո՞ղ էր, ջուր թափո՞ղ էր՝ չգիտեմ, դա է համակարգում այդ գործողությունները (նկատի ունի Շիշ բռնողին` Կ․ Ս.): Ամեն դեպքում` վատ բեմադրված սցենար էր, ու հիմնականում այն մարդիկ էին, ովքեր ուզում են, որ ես ապօրինի գործողություններ իրականացնեմ, այսինքն՝ իրենց հաշվառեմ, որ 4-րդ անգամ տուն ստանան կամ ապօրինի հողեր սեփականաշնորհվեն իրենց անունով և այլն։ Այդ կատեգորիայի մարդիկ են։ Այլ կասկածներ էլ ունեմ, այսինքն՝ մեկի վերաբերյալ հստակ գիտեմ, թե հովանավորն ով է, դրա մասին էլ հետո կբարձրաձայնեմ»։

Հարցրինք՝ ճի՞շտ է, որ այդ մեկը մարզպետարանի սոցիալական բաժնի պետն է, քաղաքապետը պատասխանեց․

«Չէ, ես չեմ կարող ասել, իմ իմացածն ուրիշ մարդ է»։

Հարցրինք նաև, թե հնարավո՞ր է, որ 200 հոգով գալու դեպքում այլևս դադարի Նիկոլ Փաշինյանի հրաժարականը պահանջել:

«Իհարկե ոչ, կարո՞ղ է ինչ-որ մեկն իմ անձնական կարծիքից ինձ հետ պահել, հաստատ` չէ, կամ կարող է պահել, եթե ծանրակշիռ արգումենտներ բերի։ Ես ներկայացրել եմ բոլոր այն պատճառները, որոնց համար պահանջում եմ հրաժարականը, եթե չեն համաձայնում որևէ պատճառի հետ և կբերեն ծանրակշիռ արգումենտ, ապա, բնականաբար․․․ ես կարծրացած չեմ  այն մտքին, որ ասել եմ՝ չէ, ուրեմն պիտի անեմ, ես կփոխեմ կարծիքս, եթե բերեն փաստեր, որ ես սխալվել եմ, բայց նման փաստեր ոչ ոք չի ներկայացնում, չի ներկայացվում նաև փաստեր իմ վատ, անարդյունավետ աշխատանքի վերաբերյալ, ու իմ հրաժարականն են պահանջում կարծիք արտահայտելու համար: Թող պահանջեն, եթե այդպես է, ուրեմն ոչ ոք չպիտի խոսի։ Ես նաև պահանջում եմ, որ այդ կեղտոտ լեքսիկոնը, որը Նիկոլ Փաշինյանը մտցրեց մեր օրակարգ, դա պետք է վերացվի, դա էլ գումարած մնացածին, որովհետև հայհոյում են անդեմ մարդիկ, դե թող գան, դիմացներս հայհոյեն։ Կամ ինչի՞ համար հայհոյեն․ եթե համակարծիք չես, ասա՝ համակարծիք չեմ, ես որևէ մեկին ո՛չ հայհոյել եմ, ո՛չ էլ որևէ վիրավորական բառ եմ ասել»։

Այսինքն՝ այդ 10 հոգին, որ եկել են քաղաքապետարան, հայհոյանքնե՞ր են հնչեցրել՝ հարցրինք քաղաքապետին:

«Չէ, այդ մարդիկ չէ, այդ մարդիկ ինչպե՞ս կարող են իրենց դեմքով հայհոյանք հնչեցնել, դրա համար հաստատ կպատժվեն օրենքով սահմանված կարգով, հայհոյում են այն մարդիկ, որոնք անդեմ ֆեյսբուքյան մեկնաբանություններ են գրում և այդ մարդիկ գոյություն չունեն»։