Թուրքիան ուշադիր հետևում է Ռուսաստանից С-400 զենիթահրթիռային համակարգերի մատակարարման բոլոր ասպեկտներին: Խոսքը քաղաքական, պաշտպանական, տնտեսական և տեխնոլոգիական բաղադրիչի մասին է: Այս մասին Թուրքիայի խորհրդարանում ունեցած ելույթում հայտարարել է այդ երկրի պաշտպանության նախարար Հուլուսի Աքարը, գրում է «Անադոլու» գործակալությունը:
Նախարարի խոսքով՝ Ռուսաստանի հետ С-400-ի պայմանագիրը Թուրքիայի ազգային շահերի հրատապ պահանջ էր, այլ ոչ թե ընտրության խնդիր:
«Համալիրների փորձարկումն ու տեղակայումը շարունակվում է հաստատված ծրագրին համապատասխան կերպով»,-նշել է Աքարը:
Նա ընդգծել է, որ ռուսական համալիրների գնումը չի նշանակում Անկարայի հեռացում ՆԱՏՕ-ից:
Նախարարը հերթական անգամ ընդգծել է նաև «С-400 համալիրների և հինգերորդ սերնդի F-35 ինքնաթիռների անհամատեղելիության մասին ԱՄՆ-ի մեղադրանքների անհիմն լինելը»:«Մենք պատրաստ ենք ամերիկյան կողմի հետ մշակել այդ հարցը ՆԱՏՕ-ի ներկայացուցիչների ներգրավմամբ համատեղ աշխատանքային խմբի շրջանակներում: Թուրքական կողմի այս նախաձեռնությունը դեռ արդիական է»,-ասել է նախարարը:
Ռուսական նորագույն С-400 հակաօդային պաշտպանության համակարգերի մատակարարումը, չնայած Թուրքիա-ԱՄՆ հարաբերություններում այդ պատճառով ի հայտ եկած ճգնաժամին, մեկնարկել է 2019թ.-ի հուլիսի կեսերին: Վաշինգտոնն Անկարայից պահանջել էր հրաժարվել ռուսական ՀՕՊ համակարգերը ձեռք բերելուց և փոխարենը գնել ամերիկյան արտադրության Patriot համակարգեր՝ սպառնալով կասեցնել կամ ընդհանրապես դադարեցնել ամերիկյան նորագույն F-35 կործանիչների վաճառքը Թուրքիային: Այս ամենը, սակայն, Անկարային հետ չի պահել, և վերջինս շարունակել է բանակցությունները ռուսական կողմի հետ՝ С-400-ների լրացուցիչ խմբաքանակ ձեռք բերելու ուղղությամբ:
