BC News-ը հատվածներ է ներկայացրել Հյուսիսային Կորեայի հետախուզությունում բարձր պաշտոններ զբաղեցրած նախկին ավագ գնդապետի հետ հարցազրույցից, որին պայմանականորեն անվանում է Կիմ Կուկ Սոն: Ինչպես աղբյուրը նշում է, վերջինս, թեև հեռացել է Հյուսիսային Կորեայից, այնուամենայնիվ չի ցանկանում բացահայտել իր ինքնությունը և ներկայանում է արևային ակնոցով:
Վերջինս ավելի քան 30 տարի աշխատել է ԿԺԴՀ հզոր լրտեսական գործակալությունների համար: «Գործակալությունները Գերագույն առաջնորդի աչքերը, ականջներն ու ուղեղն էին»,- ասել է հեռուստաալիքի զրուցակիցը:
Նա պնդում է, որ ինքը «պահել է նրանց գաղտնիքները, մարդասպանների է ուղարկել նրանց քննադատներին սպանելու համար, և անգամ թմրանյութերի անօրինական լաբորատորիա է հիմնել՝ «հեղափոխական» գումարներ հավաքելու համար»:
Այժմ նախկին գնդապետը որոշել է պատմել իր պատմությունը, և, ինչպես աղբյուրն է նշում, սա առաջին դեպքն է, երբ ավագ զինվորական պաշտոնյան որոշում է նման բացահայտումներ անել Փհենյանի մասին:
Ինչպես Կիմ Կուկը նշել է, ինքը բարձրաստիճան և հավատարիմ ծառայող է եղել Հյուսիսային Կորեայում, սակայն ո՛չ հավատարմությունը, ո՛չ զբաղեցրած պաշտոնն անվտանգության երաշխիք չեն այնտեղ: Նա ԿԺԴՀ-ից հեռացել է 2014 թվականին և հաստատվել Սեուլում՝ սկսելով աշխատել հարավկորեական հետախուզության հետ:
Նրա խոսքով՝ հյուսիսկորեական ղեկավարությունը հուսահատորեն փորձում է գումար ստանալ ամեն տեղից՝ անգամ թմրանյութեր և զենք վաճառելով Միջին Արևելքում և Աֆրիկայում: Վերջինս հավելել է նաև, որ Հյուսիսային Կորեայի ղեկավարությունը փորձում է բոլորին հավատացնել, որ Փհենյանի լրտեսներն ու կիբերցանցերը կարող են հասնել աշխարհի ցանկացած կետ:
