Մեծ Բրիտանիայի թագուհի Էլիզաբեթ 2-րդը մասնավոր զրույցի ընթացքում բողոքել է այն փաստից, որ ԵՄ-ն «ահավոր մեծ» է դառնում։ Նա նման կարծիք է արտահայտել՝ ի պատասխան Թուրքիայի՝ ԵՄ անդամ դառնալու վերաբերյալ քննարկումներին: Այս մասին գրում է express.co.uk-ը։
Պարբերականը նկատում է, որ որպես միապետ՝ Էլիզաբեթ ստիպված է մնալ խիստ չեզոք, երբ խոսքը վերաբերում է քաղաքական գործերին: «Էլիզաբեթ լուռ» մականունը ստացած պատմության մեջ ամենաերկարակյաց միապետը, կարծես թե, առնվազն զերծ է կուսակցական կարծիքներից: Օրինակ՝ նա երբեք մամուլին հարցազրույց չի տվել, և նրա հետ հանդիպումները միշտ գաղտնի են պահվում։
Նա չի քվեարկում և չի ընտրվում, բայց ունի կարևոր արարողակարգային և պաշտոնական դեր, ինչն առնչություն ունի երկրի կառավարության հետ։
Իհարկե, դա միշտ չէ, որ նույնկերպ է, և եղել են մի շարք դեպքեր, երբ թագուհին պատահաբար թույլ է տվել, որ իր քաղաքական հայացքները «սայթաքեն»: Սակայն, բոլորի նման, թագուհին ունի իր սեփական տեսակետներն ու հետաքրքրությունները: Նման մի դեպք է տեղի ունեցել 2011-ին, երբ Բուքինգհեմյան պալատում սուրբծննդյան երեկույթին նա «հակասահմանադրական» պնդում է արել ԵՄ ընդլայնման մասին:
Հեղինակ և հաղորդավար Ջոան Սմիթը, որն այդ ժամանակ ներկա էր Եվրոպայի հետ հարցերով նախկին պետնախարար Դենիս Մաքշեյնի հետ հանդիպմանը, հիշելով իր՝ միապետի հետ անցկացրած ժամանակը՝ ասել է, որ ինքն այնտեղ էր, երբ թագուհին արել է այդ «հակասահմանադրական» մեկնաբանությունը:Դա Բուքինգհեմյան պալատում սուրբծննդյան երեկույթին էր: Հիմնականում հրավիրված էին պատգամավորներ ու նախկին նախարարներ: Մինչ թագուհու ներս մտնելը, մեզանից մի փոքր խումբ կանգնել էր անկյունում և սպասում էր, թե երբ են իրենց ներկայացնելու: Այդ ժամանակ էր, որ ժպտացի և թագուհուն ասացի բարև, բայց նա ինձ մի ինչ-որ հպանցիկ հայացք նետեց, ու անցավ հաջորդ մարդուն։ Վերջինս մի պահպանողական պատգամավոր էր՝ իր կնոջ հետ. կինը թուրք էր: Թագուհին անմիջապես ասաց.«Ես և Ֆիլիպը պետական այցով եղել ենք Թուրքիայում»:
Ըստ տիկին Սմիթի՝ պատգամավորի կինը շատ քաղաքավարի էր, ու նկատել է, թե որքան ուրախ էին մարդիկ թագուհու այցի կապակցությամբ: Բայց այդ ժամանակ թագուհին դիմել է խմբից մեկ այլ անձի և ասել. «ԵՄ-ն ահավոր մեծանում է 28 երկրներով»։
«Նրան ասացին, որ իրականում երկրների թիվը 27-ն էր, և որ հուսով են, որ Թուրքիան ևս շուտով կմտնի Միության կազմի մեջ, որին, ի պատասխան, թագուհին ասել. «Օ՜, մենք չենք ուզում, որ Թուրքիան երկար ժամանակ գա»,-վերհիշել է Սմիթը։
ԶԼՄ-ն նշում է՝ Բուքինգեմյան պալատը հրաժարվել է որևէ մեկնաբանություն տալ դեպքի առնչությամբ, բայց պալատականներից մեկը Telegraph-ին ասել է․ «Չնայած այն բանին, որ անհավանական չէ, որ Նորին Մեծությունը նման տեսակետ հայտնած լինի, հնարավոր է նաև, որ նրա խոսքերը դուրս են բերվել ընդհանուր համատեքստից։ Թագուհին լավ հարաբերություններ ունի Թուրքիայի հետ»։Հիշեցնենք՝ 2016 թվականից Թուրքիայի և դաշինքի անդամակցության բանակցությունները կանգ են առել: Բրյուսելը մեղադրել և քննադատել է Թուրքիային մարդու իրավունքների խախտումների և օրենքի գերակայության հարցում առաջընթացի պակասի համար: Բացի այդ՝ 2017-ին ԵՄ պաշտոնյաները հայտնել են, որ Թուրքիայի պլանավորված քաղաքականությունը խախտում է Կոպենհագենի`ԵՄ-ին անդամակցելու իրավասության չափանիշները:
Նշենք՝ միապետը թագավորական ընտանիքի միակ անդամը չէ, որը քաղաքական մեկնաբանություններ է արել, մասնավորապես`Եվրոպային վերաբերող:
Express.co.uk-ի տրամադրության տակ հայտնված Բրյուգեի խմբի զեկույցում արքայազն Չարլզն ավելի վաղ քննադատել է Եվրոպական տնտեսական համայնքը (ԵՏՀ)՝ անվանելով այն «խելագար բյուրոկրատիա»:
