Արագածոտնի մարզի Կարբի գյուղի տներից մեկում օրեր առաջ գողության փորձ կատարելու ժամանակ բռնված ու վնասվածքներով հիվանդանոց տեղափոխված պարեկային ծառայության սպայի նկատմամբ խափանման միջոց է ընտրվել կալանքը։ Տեղեկությունը հայտնեց Քննչական կոմիտեի նախագահի մամուլի քարտուղար Գոռ Աբրահամյանը։
«Բնակարանային գողության փորձ կատարելու ժամանակ բռնված եւ վնասվածքներով բուժկենտրոն տեղափոխված անձին մեղադրանք է ներկայացվել 6 դրվագ՝ բնակարանային գողություն (ՀՀ քրեական օրենսգրքի 254-րդ հոդվածի 3-րդ մասի 2-րդ կետ) կատարելու եւ մեկ դրվագ՝ բնակարանային գողության փորձ կատարելու (ՀՀ քրեական օրենսգրքի 44-254-րդ հոդվածի 3-րդ մասի 2-րդ կետ) համար։ Նրա նկատմամբ որպես խափանման միջոց է ընտրված կալանքը»,- ասաց Գոռ Աբրահամյանը։
Ավելի վաղ հայտնել էր, որ Շիրակի մարզի պարեկային ծառայության սպան՝ կապիտան Ռաֆիկ Հայրապետյանը, Արագածոտնի մարզի Կարբի գյուղում բնակարանային գողության փորձի ժամանակ բռնվել է ու մարմնական վնասվածքներով տեղափոխվել Աշտարակի բժշկական կենտրոն։
Կարբի համայնքի ղեկավար Ռոնալդ Հակոբյանը մեզ հետ զրույցում հաստատել էր տեղեկությունը, որ գյուղի բնակիչ Ռաֆիկ Հայրապետյանը փորձել է գողություն կատարել տներից մեկում, որի տերերը տանը չեն եղել, հարսանեկան միջոցառման են մասնակցել։
Քննչական կոմիտեում դեպքի առթիվ քրեական վարույթ էր հարուցվել՝ Քրեական օրենսգրքի 44-254-րդ հոդվածի 3-րդ մասի 2-րդ կետի հատկանիշներով (բնակարանային գողության փորձ կատարել):
