Հայաստանի Ազգային ժողովի նախագահ Ալեն Սիմոնյանն այսօր լրագրողների հետ ճեպազրույցում հայտարարեց, որ «Արցախի իշխանություններն այս կամ այն ձևով անմիջական կապի մեջ են Ադրբեջանի իշխանությունների հետ, ինչպես նաև Ռուսաստանի զորախմբի ներկայացուցիչների հետ»։ Ավելին՝ Սիմոնյանը նշել է, որ «Ռուսաստանի հետ շփումներն ավելի դժվար են տեղի ունենում, քան՝ Ադրբեջանի հետ»։
Ի դեպ, ըստ ՀՀ ԱԺ նախագահի՝ Ադրբեջանի հետ Արցախի իշխանությունների շփումները եղել են շատ վաղուց։
Ինքնին այս հայտարարությունը հետաքրքիր է, քանի որ ՀՀ իշխանությունները պարբերաբար հայտարարում են, որ Ստեփանակերտն ու Բաքուն պետք է ուղիղ կապի մեջ լինեն, ասել է թե՝ Արցախը ինքնուրույն իր հարցերը լուծի: Այսօր էլ Փաշինյանը նման հայտարարություն է արել.
«Ադրբեջանի և Լեռնային Ղարաբաղի միջև պետք է սկսվի քաղաքական խոսակցություն և ԼՂՀ-ի մեր գործընկերները պետք է հնարավորություն չտան, որ որևէ մեկը իրենց մեղադրի կառուցողական խոսակցությունը խափանելու մեջ կամ նման խոսակցությունն անհնար դարձնելու մեջ»,- ասել էր նա Կառավարության նիստում:
Ալեն Սիմոնյանի այս հայտարարությունը մեր ուշադրությունը չէր գրավի, եթե հենց երեկ MediaHub-ը այս հարցի պարզաբանման համար դիմած չլիներ Արցախի նախագահ Արայիկ Հարությունյանին: Մասնավորապես, վերջինիս մամուլի խոսնակ Լուսինե Ավանեսյանին խնդրել էինք պարզաբանել հետևյալ հարցը՝ արդյո՞ք պետական մակարդակով Արցախը փորձում է ուղիղ բանակցություններ վարել Ադրբեջանի և ՌԴ-ի հետ։
“Արցախի Հանրապետության արտաքին քաղաքականության կարևոր ուղղություններից մեկը տարբեր մակարդակներում հարաբերությունների հաստատումը և ամրապնդումն է պետությունների և միջազգային կառույցների հետ: Ինչ վերաբերվում է Ադրբեջանի հետ հարաբերություններին, ապա Արցախի Հանրապետության նախագահը միշտ նշել է ԱՀ իշխանությունների՝ Ադրբեջանի հետ երկխոսության պատրաստ լինելու մասին՝ ընդգծելով նաև կարմիր գծերի գոյությունը: 2020 թվականի նոյեմբերից ի վեր ադրբեջանական կողմի հետ բոլոր շփումները տեղի են ունեցել ԱՀ-ում տեղակայված ՌԴ խաղաղապահ զորակազմի հրամանատարության միջնորդությամբ և մասնակցությամբ”,- արձագանքել էր Հարությունյանի խոսնակը:
Ինչ վերաբերում է հարցին, թե, ըստ էության, Վիտալի Բալասանյանն էր Ադրբեջանի հետ բանակցողը, նրան ԱԽ քարտուղարի պաշտոնից ազատելուց հետո ո՞վ է բանակցում, Արցախի նախագահի խոսնակն ասել էր.
“ԱՀ պետական կառույցների ներկայացուցիչները ՌԴ խաղաղապահների միջնորդությամբ և մասնակցությամբ ադրբեջանական կողմի հետ քննարկել են բացառապես հումանիտար և ենթակառուցվածքներին վերաբերող հարցեր: Ադրբեջանի կողմից Արցախի հանրապետության շրջափակումից հետո նման խնդիրների կարգավորմամբ զբաղվում են միայն խաղաղապահները”:
Ի՞նչ է ստացվում: Ալեն Սիմոնյանն ասում է մի բան, Արցախի նախագահականից՝ մեկ այլ: Ընդ որում, ՀՀ ԱԺ նախագահը պնդում է, թե՝ «մի կողմը դրա անունը դնում է ներկայացուցիչ, մյուս կողմը՝ բանակցություն, բայց, այնուամենայնիվ, անմիջական խոսակցություն տեղի է ունենում»:
Այսպիսով հարց՝ ո՞վ է ստում կամ ո՞վ է անտեղյակ իրավիճակից: Եվ ինչ է այս ամենի տակ թաքնված:
