Նոր զարգացումներ դեկտեմբերի 5-ին Ամասիայում անցկացված ՏԻՄ ընտրություններից հետո:
Ինչպես հայտնում է ambion-news.am-ն, Ամասիա կրկնակի խոշորացվող համայնքում, որը կունենա 19 բնակավայր, առաջադրված 3 քաղաքական ուժերի մանդատները բաշխվել էին հետևյալ կերպ. 6-ական մանդատ ստանալու էին «Ամասիա-Արփի» դաշինքն ու «Քաղաքացիական պայմանագիր» կուսակցությունը, 3 մանդատ էլ՝ Հայաստանի Հանրապետական կուսակցությունը:Ընտրություններից օրեր անց «Ամասիա-Արփի» դաշինքն ու ՀՀԿ-ն հայտարարել էին միացյալ տեղական ինքնակառավարման մարմին ձևավորելու մասին, ինչի արդյունքում համայնքի ղեկավարի պաշտոնը ստանձնելու էր Ամասիա համայնքի ղեկավար, «Ամասիա-Արփի» դաշինքը գլխավորող Ջեմմա Հարությունյանը: Բայց հետընտրական զարգացումներն այլ ուղղությամբ ընթացան, ու որոշ տեղեկությունների համաձայն՝ «Ամասիա-Արփի» դաշինքը համաձայնել էր համագործակցել «Քաղաքացիական պայմանագիր» կուսակցության հետ, բայց պայմանով, որ համայնքի ղեկավար լինի Ջեմմա Հարությունյանը: Բայց դա 17 ձայն ավել ստացած ՔՊ-ականներին դուր չէր եկել, և նրանք ավագանու մանդատներից հրաժարվելու դիմումներ էին ներկայացրել թիվ 30 տարածքային ընտրական հանձնաժողով:Հանձնաժողովն այսօր նիստի ժամանակ քննարկեց նրանց ինքնաբացարկի դիմումները: Ամասիայի ՏԻՄ ընտրություններին առաջադրված «Քաղաքացիական պայմանագիր» կուսակցության ընտրացուցակի բոլոր 31 թեկնածուներն էին ինքնաբացարկի դիմումներ ներկայացրել, այսինքն տարածքային ընտրական հանձնաժողովին առաջարկում էին իրենց ցուցակն ամբողջությամբ ճանաչել անվավեր: Ցուցակի բոլոր թեկնածուներն անհատական դիմումներ էին ներկայացրել իրենց ստորագրություններով ու նոտարական վավերացմամբ:
Տարածքային ընտրական հանձնաժողովը որոշեց ուժը կորցրած համարել ՔՊ-ի ցուցակում նրանց գրանցումները: Որոշման նախագիծ ընդունվեց, որը կներկայացվի Կենտրոնական ընտրական հանձնաժողով: Այսօր նաև ընտրված ավագանու թեկնածուներին մանդատներ տրամադրվեցին:
Թիվ 30 տարածքային ընտրական հանձնաժողովի նախագահ Արթուր Խաչատրյանի խոսքերով՝ մանդատներից հրաժարվելու պատճառների մասին իրենք իրավասու չեն իմանալ, բայց և այս հրաժարումից հետո նորից ընտրություններ Ամասիայում չեն նշանակվի: Սա բացառվում է, քանի որ, ըստ Արթուր Խաչատրյանի, օրենքի պահանջն ապահովված է, այսինքն Ամասիայում ավագանու անդամների 50+1 տոկոսն արդեն ունենք, ովքեր կարող են ընտրել համապատասխան կարգով համայնքի ղեկավար և ավագանի:
Ամասիայում 15 անդամից կազմված ավագանիով էր ՏԻՄ-ը ձևավորվելու, 8 մանդատ ունենալու դեպքում արդեն մեծամասնություն կլիներ, բայց հիմա 9 անդամները մանդատ ստացան ու մեծամասնություն կկազմեն: Իսկ մանդատից հրաժարված ավագանու 6 անդամների տեղերը թափուր կմնան, այսինքն, ըստ հանձնաժողովի նախագահի, 5 տարի Ամասիայի ՏԻՄ-ը կաշխատի ավագանու 9 անդամով:
Արթուր Խաչատրյանը նշեց, որ Ամասիայում ընտրություններն անցել են բացարձակ անթերի, ոչ մի գրանցամատյանում թեկուզ 1 գրառում չի եղել, ոչ մի արձանագրություն, հատուկ կարծիք տեղամասային ընտրական հանձնաժողովների անդամներից ու վստահված անձանցից չեն ունեցել, բողոքարկում էլ չի եղել: Երեկ գիշեր լրացել է Կենտրոնական ընտրական հանձնաժողով բողոքարկման վերջնաժամկետը, բայց ընտրությունների արդյունքների վերաբերյալ որևէ բողոքարկում չի ստացվել:
«Սա նախադեպը չունեցող երևույթ է ՏԻՄ ընտրություններում, երբ ավագանու մանդատներից միաժամանակ հրաժարվում են մի քանի թեկնածուներ»,-ասում է Արթուր Խաչատրյանը: -Նախկինում եղել են հրաժարումներ, բայց ավագանու հատուկենտ անդամների, ովքեր հիմնականում արտագնա աշխատանքի են մեկնել: Նաև առաջին անգամ էր ՏԻՄ ընտրություններ անցկացվում համամասնական ընտրակարգով, այդ իսկ պատճառով էլ ոչ թե անձերի, այլ կուսակցականների միասնական դիրքորոշում արձանագրվեց»:
Ամասիայում ՔՊ-ի ցուցակը գլխավորող Մերգել Ղարիբյանը ambion-news.am-ին հայտնեց, որ ավելի ուշ կպատասխանի մեր հարցերին, իսկ հետո հեռախոսահամարը չպատասխանեց: Բայց մեր ունեցած տեղեկություններով՝ ՔՊ-ականները ինքնաբացարկի դիմում ներկայացրել են Ամասիա խոշորացված համայնքի ղեկավարի ընտրության շուրջ անհամաձայնության պատճառով: Հիշեցնենք, որ Մերգել Ղարիբյանը, ով 17 ձայնի առավելություն ուներ Ջեմմա Հարությունյանի նկատմամբ, չհանդուրժեց, որ իրենից քիչ ձայներ հավաքած թեկնածուն դառնա համայնքապետ:
Ջեմմա Հարությունյանը ևս հեռախոսազանգերին չէր պատասխանում: Իսկ ՀՀԿ Գյումրու շրջանային և Շիրակի տարածքային կառույցի ղեկավար Արտյոմ Ղուկասյանը ԳԱԼԱ-ին փոխանցեց, որ «Ամասիա-Արփի» դաշինքի կողմից համագործակցության պաշտոնական առաջարկ իրենց կուսակցությանն այդպես էլ չեղավ:
«Ըստ երևույթին, մենք մեր ճանապարհով կգնանք, իրենք՝ իրենց»,- նշեց Արտյոմ Ղուկասյանը, իսկ ՀՀԿ-ի 3 ավագանիները կլինեն ազատ՝ որոշումներ կայացնելու հարցում: Արտյոմ Ղուկասյանը չցանկացավ կարծիք հայտնել ՔՊ-ի ավագանիների մանդատներից հրաժարվելու վերաբերյալ:
